PARIS, 26 janar /ATSH-DPA/ – Agjencia Ndërkombëtare e Energjisë (IEA) ka parashikuar një rritje prej 2,5% të kërkesës globale për gaz këtë vit, megjithëse furnizimi i shtrënguar mund të çojë në një luhatje të çmimeve.
Arsyet për këtë përfshijnë temperaturat më të ftohta të dimrit se vitin e kaluar dhe rritjen e kërkesës nga industria për shkak të çmimeve më të ulëta.
Vetëm një rritje e lehtë e konsumit të gazit parashikohet për prodhimin e energjisë elektrike, pasi konsumi më i lartë në rajonin e Azi-Paqësorit, Amerikën e Veriut dhe Lindjen e Mesme ka të ngjarë të balancohet pjesërisht nga kërkesa më e ulët në Evropë.
“Një rritje e kufizuar në prodhimin global të gazit të lëngshëm (LNG) ka të ngjarë të frenojë rritjen e kërkesës në vitin 2024”, sipas IEA-s.
Për shkak të vonesave në impiantet e likuidimit, furnizimi me gaz të lëngshëm pritet të rritet me 3,5% këtë vit, që është më pak se në vitet e mëparshme.
Rritja e kërkesës dhe oferta e pakët mund të kontribuojnë ndjeshëm në luhatjet e çmimeve gjatë vitit.
Sipas vlerësimeve të IEA-s, pasiguritë gjeopolitike si luftërat në Ukrainë dhe Lindjen e Mesme janë aktualisht faktori më i madh i rrezikut për tregjet globale të gazit.
Vitin e kaluar, kërkesa globale për gaz u rrit me vetëm 0,5%, ndërsa rritja në Kinë, Amerikën e Veriut dhe vendet në Afrikë dhe Lindjen e Mesme të pasura me gaz u balancua pjesërisht nga rëniet në rajone të tjera si Evropa.//a.i/
