Një polak është arrestuar dhe është akuzuar për planifikimin e vrasjes së presidentit ukrainas Volodymyr Zelenskyy, raporton BBC.
Polaku për këtë plan kishte ndihmën e inteligjencës ruse, transmeton gazeta online Reporteri.net.
Prokuroria polake ka bërë të ditur se i dyshuari me emrin Pawel K, ishte angazhuar në mbledhjen e informacioneve për aeroportin në Poloni që përdorej nga presidenti i Ukrainës.
Ai është arrestuar në bazë të informacioneve të siguruara nga inteligjenca ukrainase.
Në rast se shpallet fajtor, ai mund të dënohet me tetë vjet burgim. I dyshuari është në paraburgim.
Sipas prokurorisë polake, Pawel K ishte në kontakt direkt me rusët e përfshirë në luftën në Ukrainë.
Aeroporti Rzeszow-Jasionka ishte i vogël para fillimit të luftës, por është bërë i rëndësishëm për Ukrainën pas fillimit të pushtimit nga Rusia.
Është kyç në furnizimin me armatim të Ukrainës nga Perëndimi.
