Punësimet e reja në ndërmarrje publike historikisht janë komentuar për lidhjet e mundshme me pushtetarët. Në atë rrugë shkon edhe një konkurs i KEK-ut, në të cilin ka dalë i pari nipi i një deputeti dhe kandidati për kryetar komune nga LVV-ja.
Valon Gashi është i pari në listën e të pranuarve për pozitën “teknik i makinerisë”, në Korporatën Energjetike të Kosovës. Gazeta Express mëson se ai është nipi i deputetit të Lëvizjes Vetëvendosje, Halil Thaçi, i cili ishte edhe kandidat i kësaj partie për kryetar të komunës së Obiliqit.
Gazeta Express ka provuar të marrë një prononcim nga deputeti i VV-së rreth punësimit të tij dhe ka pyetur në KEK për konkursin, por, deri në publikimin e këtij teksti, nuk ka marrë asnjë përgjigje.
