Milani nuk zhgënjen në ndeshjen e fundit të kampionat dhe mbyll në mënyrën më të mirë këtë sezon të shkëlqyer, duke u shpallur kampion i Italisë për sezonin 2021-2022, një sukses që mungonte prej 11 vitesh.
Kuqezinjtë e Piolit dominojnë sfidën kundër Sassuolos dhe fitojnë 3-0 në “Mapei Stadium”. Milani fiton titullin e 19-të në histori dhe ngre trofeun që mungonte që nga sezoni 2010–2011.
Edhe Interi fiton 3-0 ndeshjen kundër Sampdorias, por zikaltërit detyrohet të zbresin nga froni, sepse tashmë janë rivalët kuqezi kampionët e Italisë.
“Djalli” nuk gabon në aktin e fundit të Serie A dhe nis vrullshëm sfidën kundër Sassuolos, duke krijuar shumë raste shënimi në 15 minutat e para. Më pas sfida zhbllokohet nga Giroud dhe tifozët kuqezi nisin festën. Francezi shënon edhe golin e dytë personal pak minuta më vonë, ndërsa Kessie vulos avantazhin e trefishtë pa përfunduar akoma pjesa e parë.
Protagonist ka qenë edhe Leao, që ndonëse nuk ka shënuar ka dhënë 3 asiste për shokët e skuadrës. Nuk ka më histori kjo sfidë dhe Milani bashkë me të gjithë tifozët kuqezi pret vetëm që të mbarojë pjesa e dytë e lojës, që të fillojë festa e titullit. Shënon edhe Ibrahimovic në pjesën e dytë, por goli i tij anulohet për pozicion jashtë loje.
Interi nis vrullshëm ndeshjen dhe krijon disa raste shënimi, por lajmet që vijnë nga“Mapei Stadium” për 3 golat e Milanit shuajnë ëndrrën titull. Në pjesën e dytë Perisic zhbllokon sfidën, ndërsa Correa shënon një dygolësh dhe vulos këtë fitore të Interit. / Oversport.tv
Foto: AC Milan Twitter
Itali-Serie A / Java e 38-të
Sassuolo-Milan 0-3
Giroud 17’, 32’, Kessie 36’
Inter- Sampdoria 3-0
Perisic 49’, Correa 55’, 57’
