Çdo orë që kalon rrit numrin e jetëve të humbura nga tërmeti shkatërrues në Turqi.
Shifrat më të fundit tregojnë se deri më tani numri viktimave ka kapur shifrën e mbi 28.000 personave.
Përpjekjet e ekipeve të kërkim shpëtimit, thotë Sky News, vijojnë duke përdorur kamerat termike për të lokalizuar të mbijetuar, por shpresa e gjetjes të personave gjallë sa vjen e zbehet.
Mbrëmjen e të shtunës paçka se kishin kaluar 133 orë nga tërmeti mediat në Turqi transmetuan nxjerrjen nga rrënojat të një familje në Kahramanmaras.
Shqetësimi sa vjen e shtohet për ekipet e kërkim shpëtimit mbërritur nga e gjithë bota në ndihmë të shtetit turk.
Dy organizata gjermane pezulluan operacionet e kërkim shpëtimit sikurse edhe një ekip i ushtrisë austriake, për arsye sigurie të personelit të tyre.
AFP thotë se në qytetin e Antakya, ku kërkimet vijojnë pronarët e dyqaneve janë bërë bashkë për të mbrojtur pronat nga hajdutët.
Një person i dyshuar si grabitës u ndalua dhe u rrah, ndërsa një banorë i kësaj zone tregoi se situata e grabitjeve është e frikshme.
Gazetarët e BBC në terren raportojnë, se qeveria turke deri më tani ka lëshuar 113 urdhër arresti për personat e përfshirë në ndërtimin e pallateve të shembura.
Policia turke ka bërë të mundur arrestimin e 12 personave, kontraktorë ndërtimesh.
Priten arrestime të tjera thotë BBC, të cilat shihen si një tentativë fajësimi për pasojat shkatërrimtare të tërmetit.
Prej shumë vitesh ekspertët kishin paralajmëruar se ndërtimet e reja në Turqi ishin të pasigurta si pasojë e korrupsionit dhe politikave të qeverisë.
Këto politika lejuan një amnisti për kompanitë e ndërtimit, të cilat kishin shkelur rregullat e si pasojë sollën, një bum ndërtimesh edhe në zonat e prekura nga tërmeti.
Me mijëra godina u rrafshuan nga tërmeti duke ngritur pyetjen nëse në këtë fatkeqësi natyrore pati impakt e ndihmuan dështimet njerëzore.
Top Channel
