LONDËR, 12 shkurt /ATSH-DPA/ – Ministri i Jashtëm i Britanisë së Madhe, David Cameron tha se deklarata e Donald Trump se Shtetet e Bashkuara te Amerikes nuk do të mbrojnë aleatët e NATO-s nëse ata nuk shpenzojnë mjaftueshëm për mbrojtjen, nuk ishte një qasje e arsyeshme.
Cameron është ministri i parë i kabinetit që kritikoi në mënyrë eksplicite deklaratat e bëra nga kandidati republikan për president të shtunën.
“Downing Street” tha më vonë se kryeministri Rishi Sunak është i bindur se SHBA-ja do të vazhdojë të jetë një aleat i besueshëm, pavarësisht se kush i fiton zgjedhjet e vendit këtë vit.
“Unë jam një mbështetës shumë i fortë i NATO-s. Kjo është ajo që na ndihmon për të na mbajtur të sigurt dhe që mbetet thelbësore, në këtë botë ku kemi parë pushtimin e tmerrshëm të paligjshëm të Ukrainës nga presidenti rus Vladimir Putin”, tha ministri i Jashtëm duke folur me gazetarët.
“Dhe në fakt NATO këtë vit është bërë më e fortë, me bashkimin e Suedisë dhe Finlandës”, shtoi ai.
“Sigurisht që ne duam që të gjitha vendet, si ne, të shpenzojnë 2% të PBB-së, por mendoj se ajo që u tha nuk ishte një qasje e arsyeshme”, theksoi Cameron. //a.i/
