Liverpuli duket se ka gjetur trajnerin që do të jetë pasardhësi i Jurgen Klop, pasi ky i fundit do i japë lamtumirën skuadrës në fund të këtij sezoni. Në Portugali bëjnë të ditur se gjatë ditës së sotme do të ketë një takim mes drejtuesve të klubit anglez dhe trajnerit Ruben Amorim, i cili po bën mjaft mirë në drejtimin e Sporting Lisbonës dhe shihet si emri i duhur për të vazhduar në rrugën e nisur nga tekniku gjerman.
Në klubin anglez mendohej se do të zbarkonte Çabi Alonso, por vendimi i këtij të fundit për të qëndruar te Leverkuseni të paktën edhe një tjetër edicion, ka bërë që tani në “Anfield” të kërkohet një tjetër emër i rëndësishëm.
Amorim ishte një nga emrat më të vlerësuar dhe sapo ra hipoteza e kthimit të Alonsos te të kuqtë, ai u bë kandidati kryesor për të marrë drejtimin e klubit legjendar. Gazetari i njohur portugez Pedro Sepulveda, ka bërë të ditur se këtë të hënë ka një takim mes palëve, për të diskutuar detajet e marrëveshjes me 39-vjeçarin. Ai bëri mjaft mirë sapo mori drejtimin e Sporting Lisbonës duke e kthyer pas 19 vitesh te titulli kampion dhe aktualisht kryeson përsëri kampionatin portugez.
PANORAMASPORT.AL
