TEL AVIV, 31 tetor /ATSH-DPA/ – Të paktën 31 gazetarë janë vrarë në luftën e Gazës, sipas një organizate joqeveritare.
”Midis tyre ishin 26 palestinezë, katër izraelitë dhe një gazetar libanez”, sipas Komitetit për Mbrojtjen e Gazetarëve (CPJ), me qendër në SHBA.
Në Gaza, gazetarët përballen me rreziqe veçanërisht të larta për shkak të një ofensive tokësore, sulmeve ajrore shkatërruese izraelite, komunikimit të ndërprerë dhe ndërprerjeve të gjera të energjisë.
Sipas CPJ-së, tetë gazetarë janë plagosur dhe nëntë janë ende të zhdukur ose të ndaluar.
Ka gjithashtu raporte të pakonfirmuara për vdekje të tjera, zhdukje, kërcënime ndaj gazetarëve dhe dëmtime të zyrave të medias dhe rezidencave të gazetarëve.
”Gazetarët në të gjithë rajonin po bëjnë sakrifica të mëdha për të mbuluar këtë konflikt”, shkruan CPJ në një deklaratë.
“Ata në Gaza, në veçanti, kanë paguar, dhe vazhdojnë të paguajnë, një taksë të paprecedentë dhe përballen me kërcënime eksponenciale. Shumë prej tyre kanë humbur kolegët, familjet dhe objektet e medias dhe kanë ikur duke kërkuar siguri kur nuk ka strehë apo dalje të sigurt”, shton ajo.
Organizata ka publikuar një listë të viktimave dhe lëndimeve të konfirmuara, duke përfshirë stafin nga faqet e internetit dhe agjencitë e lajmeve, si dhe transmetuesit e radios dhe televizionit.
Ushtria izraelite kishte informuar më parë agjencitë e lajmeve Reuters dhe AFP se nuk mund të garantonin sigurinë e punonjësve të tyre në Rripin e Gazës.
Të dyja agjencitë kërkuan garanci se gazetarët e tyre nuk do të ishin në shënjestër të sulmeve izraelite.
Reuters citoi letrën e ushtrisë izraelite, ku thuhej se “ne nuk mund të garantojmë sigurinë e punonjësve tuaj dhe ju nxisim fuqimisht që të merrni të gjitha masat e nevojshme për sigurinë e tyre”.
Reporterët pa Kufij (RSF) e karakterizon Rripin e Gazës si një zonë veçanërisht armiqësore për sa i përket lirisë së shtypit.
Hamasi në pushtet dhe organizata militante palestineze Xhihadi Islamik dihet se ngacmojnë dhe pengojnë gazetarët e dyshuar për bashkëpunim me Izraelin.
Anasjelltas, RSF-ja deklaron se Izraeli e ka shtypur vazhdimisht mbulimin e Rripit të Gazës që nga fillimi i konfliktit./ a.jor.
