Kina njoftoi sot një seri masash të reja për të nxitur kërkesën për automobila nga konsumatorët, duke deklaruar se do të marrë në konsideratë zgjatjen e lehtësimit tatimor për automjetet elektrike dhe duke theksuar planet për ndërtimin e një numri më të madh stacionesh rikarikimi, si dhe nxitjen e tarifave më të ulëta.
Planet, e njoftuara nga Ministria e Tregtisë në një deklaratë të përbashkët me 16 departamente të tjera, rritën aksionet e shtëpive automobilistike kineze, Geely (0175.HK) +6% dhe Great Wall Motor (601633.SS) +4%.
Tregu më i madh automobilistik në botë është goditur fort në muajt e fundit nga masat e ashpra të kufizimeve në Shangai dhe në pjesë të tjera të vendit për të frenuar përhapjen e variantit të koronavirusit, Omicron.
Si pjesë e përpjekjeve të reja, muajin e kaluar, autoritetet përgjysmuan taksën e blerjes së një automjeti në 5% për makinat me çmim më të ulët se 300.000 juanë (45.000 dollarë) me motor 2,0 litër ose më të vogël.
Blerësve të disa automjeteve tërësisht ose pjesërisht elektrike nuk u është dashur të paguajnë taksën e blerjes që nga viti 2014. Ministria deklaroi se mund ta braktisë planin për ta rikthyer taksën vitin e ardhshëm, duke konfirmuar një qëndrim të parë muajin e kaluar nga kabineti i vendit.
Përgjysmimi i taksës ka ndihmuar në rimëkëmbjen e tregut – shitjet e automjeteve për pasagjerë në qershor u rritën me 22% krahasuar me një vit më parë, duke arritur në 1.9 milionë njësi, sipas të dhënave paraprake të një shoqate automobilash.
Shitjet e automjeteve elektrike u rritën me 130% në 546.000 njësi muajin e kaluar, duke përfaqësuar thuajse 30% të shitjeve totale të automjeteve. Shitjet e liderit të tregut BYD Co Ltd (002594.SZ) u më shumë se trefishuan në 134.000 njësi.
Ministria ndër të tjera ka deklaruar se do të nxisë zëvendësimin e automjeteve më të vjetra, do të rrisë mbështetjen e kredisë për blerjet e makinave dhe do të heqë pengesat për shitjen e makinave të përdorura nëpër provinca të ndryshme.
/ Reuters
Monitor sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.
