Lorenzo Insigne shumë shpejt do t’i përkasë së shkuarës së Napolit. Për këtë arsye, drejtuesit napoletanë janë vënë në lëvizje për të gjetur zëvendësuesin e tij dhe duket se e kanë gjetur në Gjeorgji.
Sipas Corriere dello Sport, tashmë mungon vetëm zyrtarizimi pasi Khvicha Kvaratskhelia mund të konsiderohet një lojtar i Napolit. Gazeta shkon më tej duke thënë se talenti gjeorgjian ka kryer edhe vizitat mjekësore me ekipin e Spallettit dhe i ka kaluar ato me sukses.
Pas lamtumirës me Rubin Kazan, 21-vjeçari gjeorgjian ka vendosur ta mbyllë sezonin në shtëpi, te Dinamo Batumi. Ndërsa nga 1 korriku ai do të bëhet lojtari më i ri i Napolit, pasi është duke pritur që të hapet zyrtarisht merkato e verës.
Kvaratskhelia, një lojtar krahu shumë i shpejtë dhe i mirë në duelet një me një, do të nënshkruajë një kontratë pesëvjeçare, deri në qershor 2027. Ai do të përfitojë rreth 1.5 milionë euro në sezon. /oversport.tv
Foto: FC Dinamo Batumi, Facebook
