“Tragjeditë që kanë ndodhur në Serbi janë alarm edhe për ne si organ i ndjekjes penale dhe na detyrojnë që si institucion të mobilizohemi për kontroll më efikas të armëve në vend”.
Këtë e tha sot kryeprokurori publik Ljubomir Joveski, i cili gjithashtu shprehu keqardhje për ngjarjet në Serbi.
“Kërkoj nga të gjithë prokurorët publikë në vend që gjatë veprimeve të tyre të insistojnë në sanksione më të rrepta penale për veprën penale – Prodhimi, mbajtja dhe tregtimi pa leje i armëve apo lëndëve shpërthyese. Shtrëngimi i politikës penale duhet të reflektohet në veprimet e prokurorive publike parësore, të cilat duhet të sigurojnë që masa e sanksionit për krime të tilla të jetë brenda kufijve të përcaktuar ligjërisht pa mundësinë e masës alternative. Përveç kësaj, prokuroritë më të larta publike, në rastet e sanksionit të butë me aktgjykime të shkallës së parë, duhet të përpiqen që përmes procedurave të shkallës së dytë të marrin dënime më të larta”, thuhet në mesazhin e Joveskit.
Ai mendon se nuk duhet të ketë zbutje të sanksioneve, pasi nëse merren parasysh pasojat nga posedimi pa leje i armëve, ato janë të mëdha.
“Arma është mjet edhe për kryerjen e veprave tjera penale dhe përdorimi i saj jashtë kornizës ligjore nuk duhet të tolerohet”, theksoi Joveski.
Ai tha se është në dispozicion, nëse është e nevojshme, që Prokuroria Publike të kontribuojë në mënyrë aktive në çdo diskutim publik të mundshëm të iniciuar me qëllim të ndryshimit të dispozitave ligjore në këtë drejtim.
