TEHERAN, 10 dhjetor /ATSH-DPA/ – Të paktën 24 demonstrues iranianë përballen me dënim me vdekje pasi iu bashkuan protestave kritike ndaj autoriteteve, sipas një raporti të botuar sot.
”Etemad”, një gazetë e përditshme iraniane e lajmeve, publikoi një listë të përpiluar nga autoritetet gjyqësore duke akuzuar 25 demonstrues për “luftë kundër Zotit”, një akuzë që mbart dënimin me vdekje sipas ligjit islamik.
Muzikanti i repit, Mohsen Shekari, i cili gjithashtu ishte në listë, u ekzekutua të enjten, i akuzuar për sulmin me armë ndaj një roje sigurie, nxitje të terrorit dhe bllokimin e një rruge.
Autoritetet gjyqësore njoftuan se do të ndodhin ekzekutime të tjera.
Megjithatë, në raport, ”Etemad” i bëri thirrje gjyqësorit që të rishikojë dënimet me vdekje dhe të shmangë ekzekutimet e mëtejshme.
Ekzekutimi i Shekarit provokoi dënime të fuqishme brenda dhe jashtë vendit.
Megjithatë, udhëheqësit politikë iranianë, përfshirë presidentin Ebrahim Raisi, e përshkruan ekzekutimin si një përgjigje legjitime ndaj trazirave mbarëkombëtare.
Ndërkohë iranianët jashtë vendit planifikojnë të mbajnë një seri mitingjesh proteste gjatë fundjavës.
Protestat u shkaktuan nga vdekja e një gruaje kurde iraniane, Mahsa Amini, më 16 shtator. Ajo vdiq në paraburgimin e policisë pasi u arrestua për shkelje të kodeve islame të veshjes.
Krahas sanksioneve ndërkombëtare në lidhje me mosmarrëveshjen bërthamore, Teherani është gjithashtu subjekt i sanksioneve për shkeljet e të drejtave të njeriut./ a.jor.
