Interi merr titullin simbolik ”Kampion Dimri” teksa ka mbyllur në kryesim pjesën e parë të kampionatit në Serinë A. Një sukses i veçantë për Simone Inzagin, i cili shpreson që zikaltrit të ruajnë këtë pozitë deri në fund.
Vendin e parë e vulosi fitorja e sotme ndaj Veronës, me një gol të shënuar në minutën e tretë shtesë nga Fratezi, që ka acaruar miqtë, të cilët janë të bindur se duhej anuluar për një faull të Bastonit.
Vetë Inzagi pas ndeshjes vendosi të mos komentonte shumë këtë episod, edhe pse drejtuesit e Veronës e kishin kthyer në temë kryesore në konferencën për shtyp.
“Është e rëndësishme që të fitosh edhe këto lloj ndeshjesh. Mua më pëlqeu ekipi kur kishim topin, mungoi saktësia në pasimin e fundit. Pas avantazhit duhej të ishte gjithçka më e thjeshtë, por gjetëm përballë një kundërshtar me vlera, që erdhi këtu për të bërë një ndeshje të mirë.
I kemi përjetuar minutat e fundit. Pas barazimit kishim dy raste të pastra, pastaj pas 2-1 erdhi penaltia. Ndeshje me vuajtje, por shumë e rëndësishme.
Drejtori i Veronës flet për mungesë respekti të gjyqtarëve? Edhe unë kam humbur ndeshje kështu, ndodh dhe nuk dua të komentoj. Por në një ndeshje të tillë, një penallti në minutën e 100 duhet ta shënosh”, ishin fjalët e Inzagit.
