Pep Guardiola e përshkroi Erling Haaland si “sulmuesin më të mirë në botë” pasi Roy Keane e krahasoi norvegjezin e Manchester Cityt me një lojtar të Ligës së Dytë, që korrespondon me nivelin e katërt në Angli.
Ish-kapiteni i Manchester United e bëri deklarimin e tij në Sky Sports pas barazimit 0-0 mes Cityt dhe Arsenalit të dielën, transmeton GazetaBlic Sport.
Keane pranoi se Haaland ka një klasë të tijën para portës, por se në aspekte të tjera të lojës ai është “pothuajse si një lojtar i Ligës së Dytë”.
“Nuk jam dakord me të, absolutisht aspak, Erling është sulmuesi më i mirë në botë dhe ai na ndihmoi të arrijmë atë që arritëm sezonin e kaluar. Ai [Keane] është trajneri i nivelit të katërt”, tha Guardiola.
“Jam i befasuar që kjo vjen nga ish-lojtarët. Me gazetarët mund të kuptoj, sepse ata nuk kanë qenë kurrë në fushë, por me ish-lojtarët është gjithmonë një surprizë kur ata janë kritikë… Duket se kujtesa… [dhe bën një gjest me dorën e tij] zhduket shpejt», theksoi ai gjithashtu.
/GazetaBlic Sport/
