VJENË, 1 prill /ATSH-DPA/- Dyzet e një vende donatore kanë premtuar mbi 2.44 miliardë dollarë për të ndihmuar Afganistanin dhe vendet fqinje në vitin 2022.
Njoftimi u bë të enjten nga ndihmës-sekretari i Përgjithshëm i OKB-së për Çështjet Humanitare, Joyce Msuya në përfundim të një konference ndërkombëtare për mbledhjen e fondeve.
Në konferencën e zhvilluar online, sekretari i Përgjithshëm i OKB-së, António Guterres tha se 95% e afganëve nuk kanë mjaftueshëm për të ngrënë, duke shtuar se për shkak të varfërisë në rritje, banorët duhet të shesin fëmijët ose pjesët e trupit për të ushqyer familjet e tyre.
Për të adresuar problemin, Guterres bëri thirrje për akordimin e një ndihme humanitare prej 4.4 miliardë dollarësh.
“Gjermania do të ofrojë 200 milionë euro shtesë (223 milionë dollarë)”, njoftoi dje në konferencë ministrja e Jashtme Annalena Baerbock. //a.i/
