General Motors po përfshin Inteligjencën Artificiale në procesin e kontrollit të makinave.
Shtëpia automobilistike po bën “një investim strategjik”, në bashkëpunim me startup-in izraelit UVeye, që prodhon sisteme diagnostikuese për makinat që përdorin sensorë të Inteligjencës Artificiale për të identifikuar shpejt pjesët e dëmtuara ose problemet e mirëmbajtjes.
Investimi në UVeye u krye nga GM Ventures, fondi i sipërmarrjes së shtëpisë automobilistike, i cili ka investuar edhe në startup-e të tjera që mbështeten në Inteligjencën Artificiale.
Si pjesë e bashkëpunimit, GM do ta shesë teknologjinë e UVeye në rrjetin e vet të koncesionarëve për të azhurnuar sistemet e kontrollit të automjeteve. (Sistemet e kompanisë janë duke u testuar në një numër të vogël koncesionarësh të GM në të gjithë SHBA-në).
General Motors do të bashkëpunojë me UVeye edhe në një sërë projektesh teknologjike të kontrollit të automjeteve, që përfshijnë ankandet e makinave të përdorura, operacionet e flotës dhe shitjet e koncesionarëve automobilistikë.
Në bazë të imazheve dhe videove të ofruara nga kompania, teknologjia e UVeye i ngjan një skaneri trupi në aeroporte (body scanner) për automjetin. Makina kalon në skaner me drita të ndezura nga brenda dhe, në pak minuta, ofruesit e shërbimit kanë një raport të detajuar për gjithçka që nuk shkon në makinë e deri te presioni i gomave.
Sistema UVeye përdor Inteligjencën Artificiale, machine learning dhe telekamera me rezolucion të lartë për të kontrolluar në mënyrë “të shpejtë dhe të saktë” gomat, pjesën e poshtme dhe të jashtme të automjetit për defekte, pjesët që mungojnë dhe probleme të tjera të lidhura me sigurinë.
General Motors thotë se teknologjia e UVeye do të vihet në dispozicion të 4 mijë koncesionarëve në të gjithë SHBA-në. Në fillim të këtij viti, kompania izraelite nënshkroi një marrëveshje me një sistem të rëndësishëm të menaxhimit të shitjes me pakicë të automobilave të përdorur nga mbi 15,000 koncesionarë në SHBA.
Monitor sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.