Deputetja e PDK-së, Ganimete Musliu, sqaroi se çfarë kuptimi kishte metafora me qershi që i kishte thënë kryeministrit Kurti para pak ditësh në Kuvend.
Në emisionin Rubikon me Adriatik Kelmendin, ajo u shpreh se ajo që ka paraqitur në Kuvend të Republikës së Kosovës ka ardhur si rezultat i sjelljes së Albin Kurtit aty atë natë.
“Besoj që shumica e dinë se çka d.m.th “t’i hash qershitë”. Mendoj që metafora është shumë e pastër. Unë jam e bindur 100 % që nuk kam përdorur gjuhë joparlamentare në asnjë formë dhe rrethanë. Metafora nuk është joparlamentare”, vlerësoi Musli.
Tutje, me insistim të opinionistëve në studio, Vehbi Kajtazi e Gazmir Raci, ajo sqaroi saktësisht se çfarë kuptimi ka metafora me qershi, e përmendur nga ajo në Kuvend të Kosovës.
“Një person i cili gënjen pareshtur, ose thotë fjalë të pavërteta dhe kthehet i përpin fjalët e veta, është e njëjta me ato të qershive. Ka të bëjë me një qytetar i cili ka qenë i lodhur gjatë një udhëtimi të tij, dhe është ulur nën një qershi, i ka ngrënë qershitë sa i janë dashur, ndërsa qershitë tjera i ka keqpërdorur dhe i ka bërë të pashfrytëzueshme, sepse unë i hëngra dhe të mos i hanë të tjerët që do vijnë. Dhe kur kthehet rrugës, e zë lodhja prapë , dhe kthehet te qershitë që i ka dëmtuar vet. Ky është kuptimi”, deklaroi deputetja e PDK-së, Ganimete Musliu.
Ndërkaq, drejtuesi i emisionit, Adriatik Kelmendi, gjatë sqarimit të saj, ia tha dëmtimi i qershive në të vërtetë nënkupton urinimin mbi to. “Që i bie, ka urinuar mbi to”, i tha Kelmendi, gjë të cilën Musliu e pohoi me lëvizje koke. /Klankosova.tv
*Klikoni KËTU për t’u bërë pjesë e kanalit zyrtar të Klan Kosovës në Viber.
*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.
