MOSKE, 19 mars /ATSH-DPA/ – Forcat ajrore ruse kanë përdorur një raketë të re hipersonike për herë të parë në Ukrainë, tha sot Ministria ruse e Mbrojtjes duke shënuar potencialisht një përshkallëzim të ri në sulmin ndaj fqinjit të saj.
Moska tha se raketa “Kinzhal” – ose “Dagger” – ajër-tokë shkatërroi një depo municionesh nëntokësore në jugperëndim të Ukrainës.
”Sulmi në rajonin Ivano-Frankivsk shënon gjithashtu vendosjen e parë të raketës në luftime”, tha kjo ministri.
Raketat ”Kinzhal” lëshohen nga avionët luftarakë MiG-31 dhe, sipas Rusisë, mund të godasin objektiva deri në 2 000 kilometra larg.
Raketat hipersonike tejkalojnë shpejtësinë e zërit disa herë dhe fluturojnë me më shumë se 6 000 kilometra në orë.
Deri më tani, nuk ka pasur asnjë koment nga qeveria ukrainase në Kiev dhe pretendimi i Moskës nuk mund të verifikohet në mënyrë të pavarur./ a.jor.
