BRUKSEL, 23 janar /ATSH-ANSA/ – Sekretari i përgjithshëm i NATO-s, Jens Stoltenberg dhe shefi ekzekutiv i Agjencisë së Prokurimit dhe Mbështetjes, Stacy Cummings, nënshkruan një marrëveshje për prodhimin e municioneve të artilerisë.
Protokolli përfshin blerjen e qindra mijëra predhave 155 milimetra për një vlerë prej 1,2 miliardë dollarësh.
”Kjo tregon se strukturat e NATO-s për blerjet e përbashkëta japin rezultate”, theksoi Stoltenberg.
”Që nga korriku i kaluar, agjencia e NATO-s ka nënshkruar kontrata për 10 miliardë dollarë duke rritur kështu sigurinë transatlantike”, shtoi ai.
”Sot në Këshillin Atlantik do të diskutojmë rritjen e mëtejshme të prodhimit”, saktësoi Stoltenberg.
”Lufta në Ukrainë është kthyer në një betejë municioni, rritja e prodhimit është thelbësore për të vazhduar për të ndihmuar Kievin dhe kjo është ajo që ne po bëjmë”, deklaroi ai./ a.jor.
