BRUKSEL, 30 janar /ATSH-DPA/ – Një sondazh i 399 shitësve online në 23 shtete anëtare të Bashkimit Evropian, Islandës dhe Norvegjisë zbuloi se më shumë se një e treta po përpiqen të manipulojnë konsumatorët në blerjet online në internet, sipas Komisionit Evropian.
BE deklaroi se 148 firma po përdornin të paktën një taktikë mashtrimi mbi blerësit.
“Kjo sjellje është qartësisht e gabuar”, theksoi në një deklaratë Komisioneri Evropian i Drejtësisë, Didier Reynders.
Agjencitë kombëtare të mbrojtjes së konsumatorëve dhe komisioni zbuluan se kompanitë po mbanin informacione dhe po i drejtonin konsumatorët drejt abonimeve ose produkteve më të shtrenjta.
Sondazhi gjeti gjithashtu faqe interneti që përdorin kohëmatës artificialë të numërimit mbrapsht për të motivuar klientët të blejnë produkte të caktuara. Sipas inspektimit, 42 faqe interneti përdorën kohëmatës të rremë të numërimit mbrapsht.
Përveç kësaj, 70 faqe interneti fshehin informacione, të tilla si kostoja e dorëzimit, ose e bëjnë të vështirë përcaktimin.
Aplikacionet e tyre u shqyrtuan gjithashtu, ku 27 nga 102 aplikacione u gjetën se kryenin masa manipuluese.
”Autoritetet kombëtare duhet të kontaktojnë shitësit për të ndryshuar faqet e tyre të internetit dhe të ndërmarrin veprime të mëtejshme nëse është e nevojshme”, theksoi Komisioni Evropian. /os/
