MOSKË, 14 nëntor /ATSH-DPA/ – Hungaria dhe kompania ruse e energjisë bërthamore “Rosatom” kanë rënë dakord për zgjerimin e planifikuar prej kohësh të centralit bërthamor Paks.
“Tani mund të thuhet me siguri se dy njësitë e reja do të lidhen me rrjetin në fillim të viteve 2030”, tha sot ministri i Jashtëm hungarez, Péter Szijjártó.
Szijjártó sapo ka nënshkruar marrëveshjen përkatëse me kreun e “Rosatom”, Alexei Likhachev në qytetin e vogël të Paks, 100 kilometra në jug të Budapestit.
Dy njësitë e reja do të zëvendësojnë dy nga katër reaktorët që janë aktualisht në punë në central.
Kryeministri i Hungarisë, Viktor Orbán ra dakord për ndërtimin e centralit me presidentin rus Vladimir Putin në vitin 2014.
Rosatom do të furnizojë reaktorët dhe shufrat e karburantit. Moska dha gjithashtu një kredi prej 10 miliardë eurosh (10,7 miliardë dollarë), e cila mbulon më shumë se 80% të kostove.
Orbán nuk i ndryshoi planet edhe pas fillimit të luftës në shkallë të plotë të Rusisë kundër Ukrainës në shkurt 2022, pavarësisht presionit ndërkombëtar për ta bërë këtë.
Autoriteti shtetëror bërthamor hungarez dha lejet e nevojshme të ndërtimit vitin e kaluar.
“Zgjerimi i Paks nuk ka të bëjë më me dokumentet, por me punën e vërtetë ndërtimore”, tha Szijjártó.
Sipas medias ruse, Likhachev tha se Rusia po dërgonte forcat e saj më të mira për të punuar në vend.
“Do të ketë vëmendje të shtuar për projektin”, tha ai.
Bashkëpunimi energjetik i Hungarisë me Rusinë është kritikuar gjerësisht në Bashkimin Evropian.
Vendi anëtar i BE-së vazhdon të blejë gaz natyror dhe naftë nga Rusia.
Ukraina, fqinji i Hungarisë, ka kërkuar vazhdimisht sanksione kundër industrisë bërthamore ruse.
Centrali bërthamor Paks u ndërtua midis viteve 1969 dhe 1987. Ai ka katër reaktorë uji nën presion të tipit sovjetik VVER-440/213 dhe një prodhim ditor prej 2,000 megavat.
Kjo mbulon më shumë se 50% të kërkesave të Hungarisë për energji elektrike.//a.i/
