GAZA, 2 janar /ATSH-DPA/ – Numri i banorëve të Rripit të Gazës të vrarë në sulmet izraelite është rritur në 22 185, sipas autoritetit shëndetësor të kontrolluar nga Hamasi.
“Kjo ishte 207 më shumë se shifra e një dite më parë. 57 035 persona të tjerë janë plagosur që nga fillimi i luftës”, njoftoi sot autoriteti.
Shumica e tyre janë civilë. Shifrat nuk mund të verifikohen në mënyrë të pavarur aktualisht.
Lufta e Gazës u shkaktua nga masakra më e keqe në historinë e Izraelit, e kryer nga militantë nga Hamasi dhe grupe të tjera ekstremiste më 7 tetor në Izrael, pranë kufirit me Rripin e Gazës. Ata vranë më shumë se 1200 persona.
Izraeli u përgjigj me sulme masive ajrore dhe një ofensivë tokësore, fundi i së cilës nuk dihet ende. //a.i/
