Angus Cloud, i cili luajti në serialin hit të HBO “Euphoria”, është ndarë nga jeta në moshën 25-vjeçare.
Cloud, i cili luante rolin e tregtarit të drogës Fezco “Fez” O’Neill në serialin për adoleshentë, vdiq të hënën në shtëpinë e familjes së tij në Oakland, Kaliforni.
“Me brengën më të madhe na u desh t’i themi lamtumirë një njeriu të jashtëzakonshëm sot”, thuhet në një deklaratë nga familja e Cloud.
Sipas BBC, vetëm një javë më parë aktori Cloud i dha lamtumirën e fundit babait të tij dhe sipas familjes ai ishte ishte në një “betejë me shëndetin mendor”.
“E vetmja ngushëllim që kemi është të dimë se Angus tani është ribashkuar me babanë e tij, i cili ishte shoku i tij më i mirë. Shpresojmë që vdekja e tij të jetë një kujtesë për të tjerët se ata nuk janë vetëm dhe nuk duhet ta luftojnë këtë vetëm dhe në heshtje,”- thuhej në deklaratë.
Shkaku i vdekjes nuk është dhënë.
Dy javë më parë, Cloud postoi një foto të babait të tij në Instagram ku shkruante se i mungonte.
Një burim i afërt me familjen e Cloud tha për Entertainment Tonight se Cloud “kishte qenë duke luftuar me mendime të rënda për vetëvrasje” pasi u kthye nga Irlanda ku kishte varrosur babanë e tij.
Cloud po qëndronte me familjen, raportoi ET, “ndërsa ai u përpoq të punonte për të kapërcyer pikëllimin”.
“Ne u pikëlluam jashtëzakonisht shumë kur mësuam për vdekjen e Angus Cloud. Ai ishte padiskutim shumë i talentuar dhe ishte pjesë e dashur e familjes HBO dhe Euphoria. Shprehim ngushëllimet tona më të thella për miqtë dhe familjen e tij gjatë kësaj kohe të vështirë”, tha HBO në një deklaratë.
Cloud kishte luajtur në dy filma, North Hollywood dhe The Line. Ai ishte shfaqur gjithashtu në videoklipe për artistë duke përfshirë Becky G, Karol G dhe Juice Wrld.
Por karriera e tij me të vërtetë mori hov pasi fitoi rolin e Fez, një shpërndarës droge në shkollë të mesme në Eufori.
