DOHA, 29 nëntor /ATSH-DPA/ – Presidenti gjerman Frank-Walter Steinmeier i ka kërkuar Katarit të bëjë përpjekje të mëtejshme për të siguruar lirimin e pengjeve gjermanë të mbajtur nga organizata islamike Hamas.
“Jam i sigurt se Katari do të bëjë gjithçka që është në fuqinë e tij për të ndihmuar në lirimin e pengjeve gjermane”, tha sot Steinmeier pas një takimi me Emirin Tamim bin Hamad Al Thani, në Katar.
“Por ne duhet të kuptojmë se në një situatë kaq të vështirë negociuese, nuk mund të ketë garanci”, shtoi ai.
Steinmeier theksoi se ai kishte kërkuar që të vazhdonin përpjekjet për lirimin e pengjeve, veçanërisht në lidhje me shtetasit gjermanë që ishin rrëmbyer.
“Shpresoj se mund të presim lajme të mira në ditët në vijim”, tha ai.
Katari mban marrëdhënie të ngushta me Hamasin dhe ka luajtur një rol kyç ndërmjetësues në marrëveshjen e armëpushimit midis Izraelit dhe Hamasit në Gaza.
Lufta në Gaza shpërtheu më 7 tetor me Hamasin duke masakruar 1200 njerëz në Izrael dhe duke marrë peng rreth 240 të tjerë.
“Një ofensivë ajrore dhe tokësore nga Izraeli ka vrarë pothuajse 15 000 persona dhe plagosur më shumë se 36 000 të tjerë në Gaza”, sipas Ministrisë së Shëndetësisë të drejtuar nga Hamasi. //a.i/
