VARSHAVË, 24 shkurt /ATSH-DPA/- Qeveria në Poloni dëshiron të heqë shumicën e masave kufizuese kundër koronavirusit në sfondin e rënies së shkallës së infeksionit.
“Nga 1 marsi, të gjitha kufizimet ekonomike do të hiqen. Këto përfshijnë kufizimet e kapacitetit në qendrat tregtare, restorantet, hotelet dhe objektet rekreative”, njoftoi sot në Varshavë ministri i Shëndetësisë Adam Niedzielski.
“Trendi në rënie i infeksioneve të reja është shumë i qartë”, tha Niedzielski.
E vetmja gjë që mbetet është mbajtja e detyrueshme e maskave në transportin publik dhe në ambiente të mbyllura, si dhe karantina shtatë-ditore për personat e infektuar.
Sipas Ministrisë së Shëndetësisë, 20 456 infeksione të reja u regjistruan brenda një dite të mërkurën, dhe 360 vdekje për shkak të koronavirusit në të njëjtën periudhë.
Polonia ka rreth 38 milionë banorë, më pak se gjysma e Gjermanisë.
I pyetur nëse heqja e kufizimeve ishte e përshtatshme për shkak të numrit të lartë të vazhdueshëm të vdekjeve, kryeministri Mateusz Morawiecki tha se vendet e tjera të BE-së me një kurs të ngjashëm si në Poloni po lehtësonin kërkesat gjithashtu.//a.i/
