Nënkryetarja e PDK-së, Vlora Çitaku, druan se procesi i anëtarësimit të Kosovës në Këshillin e Evropës do të zvarritet, pas mosshqyrtimit të aplikacionit të Kosovës në diskutimet e sotme të Komitetit të Ministrave në Torino të Italisë.
Çitaku thotë se institucionet bartëse të Kosovës është dashur të lobojnë për anëtarësimin e Kosovës në Këshill të Evropës për ta shfrytëzuar momentumin kur Rusia është përjashtuar nga ky institucion dhe Kosova ka mbështetjen e shumicës së nevojshme.
“Kam drojën që me mospërfshirjen e Kosovës në agjendën e sotme, ky proces do të zvarritet shumë. Kërkoj nga Qeveria e Kosovës që të përgjigjet se a ka pasur koordinim të mjaftueshëm me partnerët tanë në mënyrë që aplikacioni i Kosovës të trajtohet pozitivisht. Ne kur kemi bërë ftesë për aplikim nuk kemi nënkuptuar mbushjen e formularëve, pasi ajo është pjesa më e lehtë. Kemi kërkuar koordinim të ngushtë me aleatët tanë, fatkeqësisht ftesa sot Kosovës nuk i ka ardhur”, deklaroi ajo për KP.
Ajo thotë se nuk dihet nëse ministrja e Punëve të Jashtme, Donika Gërvalla, ka shkuar në Torino për të lobuar te ministrat e këtij komiteti, derisa kërkon angazhim më të madh të saj në këtë proces.
“Me përjashtimin e Rusisë nga ky institucion i rëndësishëm është krijuar një mundësi e artë për anëtarësimin e Kosovës në këtë institucion. Shumicën e nevojshme dhe të domosdoshme për të proceduar më tutje ne e kemi, sepse nga 46 vende anëtare tash shumica na ka njohur. Është jashtëzakonisht shqetësuese dhe brengosëse, pasi Qeveria është dashur të shfrytëzojë këtë periudhë kohore që të lobojë te vendet që na kanë njohur në mënyrë që mos të humbet momentumi dhe të procedohet më tutje”.
“Unë nuk e di se ku është sot ministrja e Punëve të Jashtme e Kosovës dhe a është takuar me ndonjë nga ministrat aty, derisa e pamë ministrin e Jashtëm të Serbisë në Torino. Kryeministrin po e shohim tash e dy javë në Amerikë me një agjendë të zbehtë. Edhe ai do të duhej të ishte i përfshirë në këtë proces. Çfarë angazhimi kanë pasur institucionet e tjera?”.
Nënkryetarja e PDK-së deklaron se Kosova duhet ta shfrytëzojë momentumin e krijuar dhe në koordinim me partnerët ndërkombëtarë të vazhdojë tutje për anëtarësim në Këshill të Evropës.
“Shpresoj që të ketë lëvizje përpara, mirëpo është e domosdoshme që në këtë fazë të gjithë mekanizmat institucionalë të Republikës së Kosovës të jenë të angazhuar me koordinim me partnerët tanë ndërkombëtarë në mënyrë që Komiteti i Ministrave të Këshillit të Evropës të ftojë Kosovën për aplikim, pasi këto janë proceduarat që duhet ndjekur. Edhe në rastin më të mirë ky është një proces i gjatë dhe merr kohë”.
“Ne nuk kemi kohë për të humbur për të filluar procesin, pasi nuk e dimë si do të jenë rrethanat gjeopolitike në kontinentin tonë pas një muaji apo tre muajsh. E pamë në zhvillimet në Ukrainë që gjërat mund të ndryshojnë shpejtë, kjo mundësi e artë që i është bërë Kosovës duhet të shfrytëzohet maksimalisht”.
Kosova javë më parë aplikoi për anëtarësim në Këshill të Evropës. Në mbledhjen e sotme në Torino të Italisë, Komiteti i Ministrave të Këshillit të Evropës nuk e përfshiu në agjendë të diskutimit aplikimin e Kosovës.
