Në prag të dy sfidave që Kombëtarja shqiptare do të zhvillojë në kuadër të “Nations League” kundër Izraelit dhe Islandës, ka folur për mediat edhe sulmuesi Sokol Cikalleshi. Ai u shpreh besimplotë se mund të arrijnë të marrin tre pikët duke marrë parasysh që edhe më para ia ka dalë të fitojë në Izrael.
“Po punojmë për aspektin e golave. Po bëjmë mirë për momentin edhe pse grupi nuk është i plotë.”
SULMI- “Më mirë është të luash me dy sulmues sepse mundësia e shënimit është më e madhe. Më e rëndësishme për mua është harmonia me njëri-tjetrin sepse na dërgon te rezultatet pozitive.”
IZRAELI- “Problemi i ndeshjes së fundit ishte se kemi bërë gabime që edhe mund të evitoheshin. Kemi bërë analiza edhe me video që mund edhe t’i përmirësojmë. Kundërshtari është i vështirë, duhet të mos pësojmë gol dhe me aftësitë që kemi përpara të marrim tre pikët.”
EKIPI I RI- “Tani jam në Arabi, jam larg. Po tentoj që të bëj një aventurë të re, kam një kontratë me Konyasporin për dy vite dhe nuk e di nëse do të kthehem apo jo. Nëse trajneri do të vendosë që të më grumbullojë edhe nëse jam larg Europës, unë jam gati. Për mua është kampionat i ri, shpresoj që të gjej rrugën e rrjetës sa më shpejt që të ndihmoj edhe Kombëtaren.”
NDESHJA- “Po të shohim ndeshjet e kaluara, kemi arritur të fitojmë në Izrael. Ndoshta mund të ndryshohet edhe skema që të jemi më ofensiv.”