BRUKSEL, 6 janar /ATSH-DPA/ – Presidentja e Komisionit Evropian Ursula von der Leyen tha se viti 2024 është një vit kyç për demokracinë, pasi evropianët janë të vendosur të shkojnë në qendrat e votimit mes sfidave të mëdha të vazhdueshme për kontinentin, kryesisht mes pushtimit të vazhdueshëm të Ukrainës nga Rusia.
“Ne kemi zgjedhjet në Evropë, kemi zgjedhjet në Shtetet e Bashkuara të Amerikës. Dhe ne do të bëjmë gjithçka që mundemi për të siguruar që demokracitë e hapura dhe të lira të mbizotërojnë”, tha von der Leyen.
Parlamenti Evropian pritet të rizgjedhet në fillim të qershorit, pasuar nga zgjedhjet presidenciale në SHBA më 5 nëntor.
Von der Leyen bëri thirrje që Evropa të fokusohet më shumë në mbrojtje.
“Evropa duhet të ketë mbrojtjen si një detyrë thelbësore”, tha ajo.
Pas përfundimit të reformave të fundit në sistemin e azilit të BE-së, duhet të bëhet e qartë se ne gjithmonë kemi respektuar angazhimet tona ndërkombëtare… Por jemi ne, evropianët, ata që vendosim se kush vjen në Evropë dhe në çfarë rrethanash dhe jo kontrabandistët dhe trafikantët”, theksoi Von der Leyen.
Von der Leyen u distancua nga propozimi i Unionit Kristiansocial CSU për të reduktuar Komisionin Evropian, organin ekzekutiv të BE-së, nga 27 komisionerët aktualë në shtatë.
Ajo tha se ishte e rëndësishme të theksonte se me të drejtë është një shqetësim shumë i rëndësishëm që të gjitha vendet anëtare të përfaqësohen në nivel evropian.
“Përfaqësimi në Komisionin Evropian nga një komisioner është jashtëzakonisht i rëndësishëm për shtetet anëtare, veçanërisht për shtetet më të vogla anëtare”, tha ajo.//a.i/
