BRUKSEL, 22 qershor /ATSH-DPA/- Komisioni Evropian do të përdorë marrëveshjet e ardhshme tregtare për të mbrojtur të drejtat e punës dhe për të ndëshkuar shkeljet klimatike dhe mjedisore në kuadër të planeve të reja të shpallura sot.
“Krahu ekzekutiv i BE-së duhet t’u drejtohet sanksioneve nëse detyrimet kryesore të punës dhe klimës nuk përmbushen nga partnerët ekonomikë”, tha në një deklaratë komisioneri i Tregtisë së BE-së, Valdis Dombrovskis.
Sipas deklaratës së Komisionit një masë e tillë do të ndodhte vetëm nëse përpjekjet për të zgjidhur mosmarrëveshjet mes Bashkimit Evropian dhe partnerëve tregtarë do të dështonin.
Shumë nga marrëveshjet aktuale të tregtisë së lirë të BE-së përmbajnë dispozita për zhvillimin e qëndrueshëm, por nuk përfshijnë mundësinë për të vendosur sanksione ndaj partnerëve tregtarë për shkelje të pajtueshmërisë.
Komisioni ka identifikuar shkeljet e parimeve të Marrëveshjes së Parisit për mbrojtjen e klimës dhe të Organizatës Ndërkombëtare të Punës (ILO), një agjenci e Kombeve të Bashkuara që promovon të drejtat e punëtorëve, te cilat do të ndiqen nga masat ndëshkuese.
Parimet e ILO përfshijnë heqjen e punësimit të fëmijëve dhe punës së detyruar, lirinë e organizimit të punëtorëve dhe eliminimin e diskriminimit.
Politika tregtare përcaktohet në nivel të BE-së dhe jo nga qeveritë kombëtare dhe tregu masiv i bllokut është një nga mjetet më të fuqishme të BE-së për të ndikuar në çështjet globale.
“Rregullat e reja do të zbatohen gjithashtu për marrëveshjet tregtare që po negociohen aktualisht me vende të tilla si Zelanda e Re”, tha Dombrovskis në një konferencë për shtyp në Bruksel.
‘Komisioni gjithashtu ka planifikuar bisedime tregtare të vazhdueshme me Indonezinë, Indinë dhe Australinë”, tha një zyrtar i lartë i komisionit të BE-së, duke folur në kushte anonimiteti.//a.i/