BRUKSEL, 1 mars /ATSH/ – Flamujt tanë janë ulur në gjysmështizë përpara selisë sonë në Bruksel pas aksidentit të tmerrshëm të trenit që mori kaq shumë jetë, mbrëmë, pranë Larisës, Greqi, shkruan sot BE në Twitter.
”Mendimet tona janë me popullin e Greqisë. E gjithë Europa është në zi me ju”, shton Komisioni Evropian.
”Jemi pranë jush”, thekson ai, në një fjali të shkruar në greqisht.
Ndërkohë, presidentja e Komisionit Evropian Ursula von der Leyen dhe presidentja e Parlamentit Evropian Roberta Metsola shprehën ngushëllimet.
”E gjithë Evropa është në zi”, shkroi Von der Leyen në Twitter.
”Mendimet e mia janë me popullin e Greqisë pas aksidentit të tmerrshëm të trenit që mori kaq shumë jetë mbrëmë pranë Larisës”, shton ajo.
”Ngushëllimet e mia të sinqerta për të gjitha viktimat, familjet dhe miqtë e tyre”, shkroi edhe Metsola në Twitter.
”Mirënjohës për të gjithë shpëtimtarët dhe stafin mjekësor në vend”, shtoi ajo.
Të paktën 36 persona u vranë dhe më shumë se 66 u plagosën kur një tren pasagjerësh u përplas dje në mbrëmje me një tren mallrash në Tempi, Greqia qendrore, pranë qytetit të Larisës, tha Shërbimi Grek i Zjarrfikësve.
”Nga 66 personat e lënduar, 23 mbeten ende në spital”, sipas zëdhënësit të Shërbimit Zjarrfikës, Vassilis Vathrokogiannis.
Punonjësit e shpëtimit vazhdojnë kërkimet për të mbijetuar duke u fokusuar në dy vagonët e parë të trenit të pasagjerëve.
Ndërkohë ministri i Shëndetësisë Thanos Plevris po viziton spitalet ku janë transportuar të lënduarit.
Shkaku i aksidentit fillimisht ishte i paqartë.
Një tren pasagjerësh që vinte nga Athina në rrugë për në qytetin port verior të Selanikut u përplas ballas me një tren mallrash që udhëtonte në drejtim të kundërt, sipas raporteve fillestare nga zyrtarët hekurudhor./ a.jor.
