BRUKSEL, 27 nëntor /ATSH-DPA/ – Edhe sekretari i përgjithshëm i NATO-s, Jens Stoltenberg iu bashkua sot thirrjeve për vazhdimin e armëpushimit në Gaza midis Izraelit dhe Hamasit.
“Unë e mirëpres që marrëveshja midis Hamasit dhe Izraelit ka çuar në lirimin e pengjeve dhe dërgimin e më shumë ndihmave humanitare”, tha ai në Bruksel.
“Unë bëj thirrje për një zgjatje të pauzës. Kjo do të mundësonte lehtësimin shumë të nevojshëm për popullin e Gazës dhe lirimin e më shumë pengjeve”, shtoi ai.
Stoltenberg përsëriti paralajmërimin e tij për një përshkallëzim të mundshëm rajonal të konfliktit.
“Ne kemi parë sulme me dronë dhe raketa mbi pozicionet e SHBA në Siri dhe Irak, si dhe sulme ndaj anijeve tregtare. Kjo nënvizon rrezikun e përshkallëzimit”, tha Stoltenberg.
“Irani duhet të frenojë përfaqësuesit e tij”, shtoi ai.
Marrëveshja katërditore e armëpushimit midis Izraelit dhe Hamasit kishte për qëllim të mundësonte një shkëmbim pengje-të burgosurish, si dhe të lejonte furnizimet me ndihma në territorin e mbyllur palestinez.
Ajo skadon nesër./ a.jor.