Delegacioni i Kuvendit të Kosovës në
Asamblenë Parlamentare të Këshillit të Evropës, i përbërë nga Saranda
Bogujevci, kryesuese dhe Arben Gashi, anëtar, ka marrë pjesë në punimet e
Komisionit për Çështje Politike dhe Demokraci të Asamblesë Parlamentare të
Këshillit të Evropës, që u mbajtën në Kretë të Greqisë, më 16 dhe 17 maj.
Delegacioni i Kuvendit të Kosovës në
APKE, ka takuar Theodora Bakoyannis, raportuese e zgjedhur për Kosovën në mars
të këtij viti, me të cilën kanë diskutuar për situatën në Kosovë, dhe për
gatishmërinë e Kosovës që të bashkëpunojnë ngushtë për përgatitjen e raportit
për “Situatën në Kosovë”.
Gjithashtu, Bogujevci e Gashi kanë
takuar edhe Tiny Kox, president i Asamblesë Parlamentare të KiE, me të cilin
kanë diskutuar rreth rrethanave të reja të krijuara pas aplikimit të Kosovës
për anëtarësim.
Në ditën e parë të punimeve, ndër të
tjera është diskutuar për raportin e ish-kryeministrit grek, George Papandreou
me temën “Mbështetja e Perspektivës Evropiane për Vendet e Ballkanit
Perëndimor”.
Në disa pika të këtij raporti,
përfshihet edhe Kosova, në të cilin potencohen të arriturat për liberalizimin e
vizave, si dhe arritjet që janë bërë në funksionimin e institucioneve
demokratike, lirinë e të shprehurit, lirinë e mediave dhe pluralizmin, si dhe
në funksionimin e mirë të administratës publike.
Gjithashtu në këtë raport, Papandreou
ka theksuar nevojën për liberalizimin e vizave për Kosovën, dhe rolin e
rëndësishëm të Asamblesë Parlamentare të KiE në këtë proces
Për këtë raport, përveç folësve të
tjerë, kanë folur edhe anëtarët e delegacionit të Kuvendit të Kosovës, Saranda
Bogujevci dhe Arben Gashi.
Duke iu referuar këtij raporti,
udhëheqësi i delegacionit të Turqisë në APKE, Ahmet Yildiz, gjatë fjalimit të
tij ka kërkuar nga vendet jo njohëse që ta njohin Kosovën, dhe që çështja e
liberalizimit të vizave të kryhet sa më parë, duke pasur parasysh përmbushjen e
të gjitha kushteve të vendosura nga Komisioni Evropian.
Në fjalën e tij, udhëheqësi i
delegacionit të Kuvendit të Serbisë në Këshillin e Evropës, Ivica Daçiq, e ka
kontestuar pavarësinë e Kosovës, duke bërë përpjekje ta luan rolin e viktimës
në Kosovë.
Ai po ashtu ka reaguar edhe në lidhje
me aplikimin e Kosovës në Këshillin e Evropës, duke përmendur edhe marrëveshjen
e Uashingtonit, të cilën sipas tij, e ka shkelur Kosova.
Gjatë fjalimit të tij, anëtari i
delegacionit të Kuvendit të Kosovë, Arben Gashi, ka thënë se Gjykata
Ndërkombëtare ka vendosur se pavarësia e Kosovës është në akordim me ligjet
ndërkombëtare, dhe si e tillë është vlerësuar si “Sui generis”.
“Kosova është njohur nga 34 shtete
anëtare të Këshillit të Evropës si shtet i pavarur. Gjithashtu dëgjova disa
gjysmë të vërteta që Kosova ka nënshkruar marrëveshje për ndërprerjen e
aplikimeve në organizatat ndërkombëtare. Por, ka kaluar një vit dhe kjo
marrëveshje ka skaduar në shtator të vitit 2021, dhe tani ne jemi në kohë,
prandaj edhe kemi aplikuar për anëtarësi në Këshillin e Evropës dhe presim
mbështetjen tuaj”, ka thënë Gashi, i cili ka kërkuar nga Papandreu që
liberalizimi i vizave për Kosovën dhe anëtarësimi në Këshillin e Evropës të përfshihen
në raportin e tij.
Ai ka përmendur nevojën që qytetarët e
Kosovës të kenë qasje në Gjykatën e të Drejtave të Njeriut, duke shtuar se për
këtë Kosova ka nevojë të jetë anëtare e Këshillit të Evropës.
Ndërsa nënkryetarja e Kuvendit, Saranda
Bogujevci, e cila gjatë fjalimit të saj, ka thënë se Kosova është shtet i
pavarur, dhe është njohur nga shumë shtete si i tillë, dhe tani dëshiron të ecë
përpara, të jetë pjesë e organizatave ndërkombëtare.
Bogujevci ka folur edhe për gjenocidin
dhe krimet serbe në Kosovë, duke bërë të ditur se është e mbijetuar e masakrës
kur ishte vetëm 13-vjeçare. Ajo, ka shtuar se në Kosovë tash e 23 vjet ka
familje që nuk e dinë ku i kanë trupat e më të dashurve të tyre.
Dhe përkundër kësaj, ajo ka thënë se
përfaqësuesit e Kosovës ende kanë vullnetin të gjejnë mënyra të zgjidhjes së
problemeve që të ecët përpara.
Bogujevci ka theksuar e Kosova beson në
përkrahjen e përfaqësuesve të vendeve anëtare të Këshillit të Evropës, që të
jetë pjesë e kësaj organizate.
Ndërkaq, në takimin e Komisionit për
Çështje Politike dhe Demokraci, më 17 maj, njëra ndër pikat e diskutimit ishte
edhe marrja e aprovimit nga anëtarët e këtij komisioni dhe vazhdimi i
referencës për pikën e agjendës “Situata në Kosovë”, ku u vendos që Bakoyannis
të hartojë një raport për situatën në Kosovë gjatë periudhës njëvjeçare.
Gjatë dy ditëve të punimeve të Komisionit për Çështje Politike e Demokraci u diskutuan tema relevante si: Drejtësia dhe siguria për gratë në pajtimet e paqes, Roli i partive politike në nxitjen e diversitetit dhe gjithëpërfshirja, një kartë e re për një shoqëri jo-raciste, Ruajtja e paqes dhe stabilitetit në Detin Mesdhe, Mbështetja e perspektivës evropiane për Ballkanin Perëndimor, si dhe tema të tjera.
