GJERMANI, 18 nëntor /ATSH-DPA/ – Kancelari i Gjermanisë, Olaf Scholz, përsëriti mbështetjen për një zgjidhje me dy shtete të konfliktit në Lindjen e Mesme dhe bëri thirrje për ndalimin e menjëhershëm të vendbanimeve izraelite në Bregun Perëndimor gjatë një takimi të bashkisë në zonën e tij elektorale të shtunën.
“Pikëpamja jonë është se duhet të ketë një zgjidhje me dy shtete”, tha Scholz në Berlin.
“Duhet të ekzistojë perspektiva e bashkëjetesës paqësore midis Izraelit si shtet dhe një shteti palestinez. Kjo është në interesin më të mirë të Izraelit”, shtoi ai.
Scholz shprehu besimin se humbja e Hamasit do të rriste mundësinë e bashkëjetesës paqësore në dy shtete, ndërsa theksoi se Gjermania refuzon ndërtimin e vendbanimeve izraelite.
“Ne nuk duam asnjë vendbanim të ri në Bregun Perëndimor”, tha ai.
Ai dënoi gjithashtu sulmet ndaj palestinezëve në rajon, të cilat janë rritur ndjeshëm që nga sulmet e Hamasit më 7 tetor.
Udhëheqësit gjermanë e përshkruajnë sigurinë e Izraelit si një “arsye shteti” dhe Scholz e përsëriti këtë mendim dje në një fjalim në parlamentin gjerman.
Izraeli dhe palestinezët nuk kanë zhvilluar bisedime thelbësore që nga viti 2014 dhe procesi i paqes sipas Marrëveshjeve të Oslos të 1993 dhe 1995 shihet si i bllokuar. //a.i/