BERLIN, 11 prill /ATSH-DPA/ – Ligjvënësi gjerman, Norbert Rottgen ka kritikuar ashpër deklaratat e presidentit francez, Emmanuel Macron, i cili tha se Evropa nuk duhet të përfshihet në konfliktin e Kinës me Tajvanin.
Rottgen, një specialist i çështjeve të jashtme në Partinë Kristian-demokrate (CDU) të opozitës gjermane, tha se Macron po izolohej.
“Macron po izolohet në Evropë, po dobëson Bashkimin Evropian dhe po kundërshton atë që tha presidentja e Komisionit Evropian, Ursula von der Leyen në Pekin”, tha Rottgen.
Deklarata e tij erdhi disa ditë pasi Macron dhe Von der Leyen u kthyen nga një vizitë shtetërore triditore në Kinë.
Tensionet po rriten në ngushticën e Tajvanit pas një takimi të presidentit të Tajvanit me një ligjvënës amerikan në Kaliforni, ndërsa Pekini kërkon të izolojë Tajvanin ndërkombëtarisht.
“Gjëja më e keqe do të ishte të mendosh se ne evropianët duhet të bëhemi ndjekës të kësaj çështjeje, dhe të marrim udhëzime nga axhenda e SHBA-së apo reagimi i tepruar kinez”, tha Macron për gazetën franceze “Les Echos”.
“Europa duhet të shmangë rënien në grackën e një krize të jashtme”, tha Macron.
“Evropa u përball me kërcënimin për t’u bërë një shërbyes midis Shteteve të Bashkuara të Amerikës dhe Kinës, ndërsa në vend të kësaj mund të jetë një pol i tretë”, tha ai. //a.i/
