ATHINË, 29 mars /ATSH-DPA/- Një tërmet i fuqishëm ka tronditur sot në mëngjes Greqinë perëndimore.
Sipas matjeve fillestare nga Instituti Gjeodinamik Grek në Athinë, vendi u godit nga një tërmet me magnitudë 5,8 ballë në orën 9:12 të mëngjesit.
Epiqendra e tërmetit ishte rreth 20 kilometra nën shtratin e detit në bregun perëndimor të gadishullit të Peloponezit pranë ishullit Stamfani (i njohur gjithashtu si Strofades), ku është ndjerë një tërmet më i vogël me magnitudë 4,1 ballë.
Organizata e Mbrojtjes Civile e Greqisë nuk ka raportuar viktima apo dëmtime në ndërtesa.
Gazetarët nga mediat lokale raportuan se shumë shkolla ishin evakuuar. Tërmeti u ndje në të gjithë Greqinë perëndimore, në ishullin turistik të Zakinthos dhe deri në Athinë, rreth 300 kilometra larg.
Pika më e thellë e Detit Mesdhe ndodhet midis Greqisë perëndimore dhe Siçilisë në Itali, me një thellësi mbi 5000 metra.
Pllakat tektonike afrikane dhe evropiane takohen në këtë rajon, i cili rrjedhimisht është i prirur ndaj tërmeteve të forta.//a.i/.
