ASTANA, 17 janar /ATSH-DPA/ – Ish-republika sovjetike e Kazakistanit ka shtrënguar rregullat e hyrjes dhe qëndrimit për shkak të numrit të madh të refugjatëve nga Rusia.
”Në të ardhmen, të huajt nga Bashkimi Ekonomik Euroaziatik i udhëhequr nga Rusia do të mund të qëndrojnë në Kazakistan pa vizë vetëm deri në 90 ditë brenda një periudhe gjashtëmujore”, njoftoi agjencia shtetërore e lajmeve Kazinform duke cituar ligjin, i cili do të hyjë në fuqi më 27 janar.
Deri më tani, rusët mund të kalonin kufirin pas rreth 90 ditësh dhe më pas të ktheheshin për të qëndruar më gjatë.
Kazakistani është shfaqur si vendi kryesor i destinacionit për anëtarët e opozitës ruse dhe kundërshtarët e ndërgjegjes pasi Bashkimi Evropian mbylli kryesisht kufijtë e tij për rusët për shkak të luftës së Moskës kundër Ukrainës.
Më shumë se 200 000 rusë janë larguar për në Kazakistan që nga mobilizimi i pjesshëm i shpallur nga presidenti rus Vladimir Putin në fund të shtatorit, sipas raporteve të mediave.
Tani ata kërcënohen me dëbim. /os/