Shtëpia më e madhe e futbollit evropian UEFA i ka publikuar katër vazot me Kombëtaret e kualifikuara deri tash, pak javë para hedhjes së shortit të fazës së grupeve për Euro 2024.
Kombëtarja shqiptare ka përfunduar në vazon e dytë, ndërsa më 2 dhjetor do të hidhet shorti i fazës së grupeve.
Mediat angleze e kanë analizuar shortin e mundshëm, ndërsa i kanë publikuar dy grupe të mundshme të “Tre Luanëve”, atë më të lehtë dhe atë më të vështirë ku mund të përfundojnë ata.
“The Sun” shpreson që anglezëve t’iu bie në grup Shqipëria, së bashku me Slloveninë e Kazakistanin, i cili është konsideruar si grupi më i mirë i mundshëm për nënkampionin aktual evropian.
Ndërkohë, mediumi britanik e ka imagjinuar edhe grupin më të vështirë apo më të keq të mundshëm, duke i vendosur në grup me Anglinë kombëtaret si Danimarka, Holanda dhe Italia.
