Shkupi dhe Tirana nuk morën datë për fillim të negociatave, as në Këshillin për Punë të Përgjithshme të Bashkimit Evropian. Këshilli ka përshëndetur progresin e Maqedonisë së Veriut në reforma, por kërkon rezultate të prekshme në tejkalimin e kontesteve me fqinjët. Në prezantimin e konkluzave të Këshillit të BE-së thuhet se Këshilli e mirëpret përcaktimin në vazhdimësi të Maqedonisë së Veriut që ta shtyjë përpara agjenden e reformave për BE, që shtroi rrugën për vendimin për hapjen e negociatave në mars 2020. Poashtu thuhet se Këshilli pret mbajtjen e konferencës ndërqeveritare me Maqedoninë e Veriut sa më shpejtë, pas miratimit të kornizës negociuese nga Këshilli.
Sa i përket çështjes së hapur me Bullgarinë, e cila po pengon hapjen e negociatave për Maqedoninë e Veriut, Brukseli përkujton se zbatimi i Marrëveshjes për Fqinjësi të Mirë është pjesë e pandashme e procesit.
Konkluzat e Këshillit të BE-së
“Marrëdhëniet e mira ndërfqinjësore dhe bashkëpunimi rajonal mbeten elemente thelbësore të procesit të zgjerimit, si dhe të procesit të Stabilizim-Asociimit. Duke u thirrur në paragrafin dy nga konkluzat e Këshillit në mars 2020, Këshilli përkujton rëndësinë e arritjes së rezultateve të prekshme dhe zbatimin e marrëveshjeve bilaterale, përfshi Marrëveshjen e Prespës me Greqinë dhe Marrëveshjen për Fqinjësi të Mirë me Bullgarinë”.
Këshilli i BE-së vlerësoi se përkundër progresit, duhet akoma më shumë punë në sferën e gjyqësorit dhe sundimit të ligjit, ndërsa ka kërkuar rishikimin edhe të legjislaturës zgjedhore.
Edhe pse paraprakisht kryeministri i sapozgjedhur bullgar Kiril Petkov, paralajmëroi qasje të re, tone më konstruktive me Maqedoninë e Veriut, vendi as këtë herë nuk mori datë për nisje të negociatave.
Në intervistën për Financial Times ai tha se do të propozoj procedurë të re në marrëdhëniet me Maqedoninë e Veriut, shumë shpejt, me afat shumë të shkurtër prej vetëm 6 muajsh.
Emine Ismaili /SHENJA/
