Partia opozitare Aleanca për Shqiptarët bën të ditur se do ta mbështesë protestën kundër hapjes së kazinove dhe lojërave të fatit në vendet e banuara dhe në afërsi të institucioneve arsimore, fetare dhe edukative. Ata sot iu përgjigjën pozitivisht thirrjes së Lëvizjes Anti-Bixhoz drejtuar partive politike, duke ftuar të gjithë të gjithë qytetarët e Tetovës pa dallime partiake t’i bashkohen protestës. Sipas tyre, mjaft është luajtur bixhoz me të ardhmen e fëmijëve tanë, dhe se duhet shpëtuar nga këta dukuri devijante dhe fatale për shoqërinë.
Adnan Neziri, deputet nga Aleanca për Shqiptarët
“Publikisht, ftojmë të gjithë anëtarët, simpatizantët e Aleancës për Shqiptarët, si dhe të gjithë qytetarët e Tetovës dhe jo vetëm, pa dallime partiake që të martën në ora 14:00 në mënyrë masovike, të marrin pjesë në protestën e organizuar nga qytetarët dhe mbështetur nga Lëvizja Anti-Bixhoz. Kjo protestë dhe kjo rrezistencë ndaj dukurive devijuese është obligim për të gjithë ne, që të parandalojmë degradimin dhe devijimin e fëmijëve dhe familjeve tona”
Ndërkaq, deputetët e Alenacës do të përpiqen që nëpërmjet Kuvendit të ndryshojnë Ligjin për lojërat e fatit, dhe në ditët në vazhdim do të dorëzojnë amendamente për t’i larguar kazinot dhe bixhozin jashtë vendbanimeve. Nga kjo parti gjithashtu thonë se do të takohen edhe me drejtuesit e Lëvizjes Anti-Bixhoz për të kordinuar qëndrimet tona dhe kërkesat e tyre dhe siç thonë për të fituar bashkë me qytetarët këtë betejë jetike për të ardhmen e shoqërisë tonë.
Tashmë një periudhë e gjatë kohore ky problem mbetet ende i pazgjidhur, pasi që në shumë qytetet të Maqedonisë së Veriut, kazinot dhe lojërat e fatit gjinden afër institucioneve, arsimore dhe të tjera. Ndërsa, ligji aktual parasheh se objektet e bizneseve private ku ushtrohen aktivitete për lojëra të fatit, nuk mund të jenë ngjitur me oborrin e institucioneve arsimore. Por, kjo nuk është e mjaftueshme për shoqatën e arsimtarëve, pasi që anembanë shkollave fillore ose të mesme, në një rreze më pak se 300 metra janë të mbushura me kazino dhe bastore sportive.
Linda Ebibi /SHENJA/
