Ministria e Energjetikës së Uzbekistanit bëri me dije se për shkak të ndërprerjeve të energjisë elektrike në provincat Alma-Atë, Shimkent, Taraz, Turkestan dhe rajonet përreth tyre në orët e mëngjesit në Kazakistan, ndërprerje ka pasur gjithashtu në rrjetin elektrik të Kirgizisë dhe Uzbekistanit.
“Si pasojë e ndryshimit të tensionit në linjën që vjen nga Kazakistani, për shkak të incidentit në Kazakistan që prek rrjetin elektrik të Uzbekistanit, i cili është i lidhur me Rrjetin e Përbashkët të Energjisë Elektrike të Azisë Qendrore, impiantet e prodhimit të elektricitetit u ndalën automatikisht me aktivizimin automatik të sistemet e mbrojtjes në termocentralet e Tashkentit dhe Sirdarisë. Për pasojë, energjia elektrike u ndërpre në rajonet Tashkent, Fergana, Andixhan, Namangan, Sirdari, Xhizak, Samarkandë, Nevai dhe Kashkadari. Aktualisht po punohet për ndarjen e çdo termocentrali nga rrjetet e energjisë elektrike të shteteve fqinje dhe rivënien e tyre në funksion në mënyrë të pavarur”, theksohet në njoftimin e Ministrisë uzbeke të Energjetikës.
Mësohet se shërbimet e metrosë në kryeqytetin Tashkent të Uzbekistanit janë ndalur për shkak të këtyre ndërprerjeve, të cilat prekën gjithashtu disa pjesë të Kirgizisë.
Në deklaratën e bërë nga KEGOC, kompania elektrike e Kazakistanit, thuhet se ndërprerja masive e energjisë në rajon është shkaktuar nga mbingarkesa në sistemin e shpërndarjes ndërmjet vendeve.
