VARSHAVË, 10 mars /ATSH-PAP/- SHBA-ja është një lider në vendosjen e sanksioneve ndaj Rusisë për pushtimin e saj në Ukrainë, tha presidenti polak, Andrzej Duda pas një takimi me zëvendëspresidenten amerikane Kamala Harris.
Presidenti polak falënderoi presidentin, zëvendëspresidentin dhe Kongresin amerikan për vendosmërinë e tyre në vendosjen e sanksioneve ndaj Rusisë.
“Për sa i përket sanksioneve, Shtetet e Bashkuara janë pararojë absolute dhe nuk gabojnë, sanksionet po funksionojnë”, tha sot Duda në një konferencë të përbashkët për shtyp me Harris.
Duda falënderoi gjithashtu SHBA-në për mbështetjen e saj ushtarake dhe ndihmën humanitare për Ukrainën në luftën e vendit kundër Rusisë.
Ai gjithashtu akuzoi ushtrinë ruse për kryerjen e krimeve të luftës në Ukrainë.
“Trupat ruse po kryejnë agresion barbar atje, duke vrarë njerëz të pafajshëm, civilë, duke bombarduar klinikat e maternitetit, ku gratë që do të lindin po nxirren me barela”, tha Duda.
“Është një kënaqësi e madhe për ne të gjithë në Poloni të shohim zëvendëspresidenten e SHBA-së Kamala Harris këtu me ne në Varshavë, në vendin tonë, duke dëshmuar për forcën dhe thellësinë e lidhjeve aleate, duke treguar angazhimin e thellë të Shteteve të Bashkuara për sigurinë e krahut lindor të NATO-s dhe Evropës në tërësi”, shtoi Duda.
“Dëshiroj të theksoj se nuk ka dyshime se ne qëndrojmë pranë Ukrainës së bashku me Shtetet e Bashkuara dhe aleatët e tjerë të NATO-s, si dhe gjithë botën e lirë dhe të drejtë”, tha Duda. //a.i/