Bëhet e ditur se në Ukrainë, ku Rusia filloi luftën më 24 shkurt, korridoret humanitare për evakuimin e civilëve nuk do të funksionojnë sot për arsye sigurie.
Zëvendëskryeministrja ukrainase Irina Vereshçuk tha në një deklaratë se korridoret humanitare nuk do të hapen sot për shkak të rrezikut në rrugë.
“Sot më 22 prill, nuk do të ketë korridore humanitare për shkak të rrezikut në rrugë. U bëj thirrje të gjithëve që presin evakuimin: Bëni durim, ju lutem prisni”, tha ajo.
Vereshçuk raportoi dje se nuk ishte e mundur të shpëtohen njerëzit që prisnin evakuimin në Mariupol për shkak të bombardimeve të forta nga trupat ruse.
Ukraina dhe Rusia shpesh kanë dështuar të arrijnë në marrëveshje për hapjen e korridoreve humanitare pasi sulmet ruse në Donbas janë shtuar që nga fillimi i javës.
Ndërkohë, kryeprokurorja ukrainase Irina Venicetova tha se Rusia ka përdorur gjithashtu fëmijë ukrainas në luftën kundër Ukrainës, duke vënë në dukje se janë identifikuar tetë raste.
Ushtria ruse “po i detyron fëmijët ukrainas të përdoren në mbledhjen ose shpërndarjen e informacionit ushtarak, transportin e armëve e kështu me radhë”, tha Venicetova.
1.141 institucione arsimore u dëmtuan në bombardimet ushtarake ruse, 99 prej të cilave u shkatërruan plotësisht, tha Venicetova, duke shtuar se 208 fëmijë janë vrarë dhe 386 janë plagosur që kur Rusia filloi sulmet e saj më 24 shkurt.
Ministri rus i Mbrojtjes, Sergei Shoigu i tha Putinit se forcat ruse kanë marrë kontrollin e qytetit dhe mbajnë të rrethuar uzinën e çelikut “Azovstal”.
Sipas agjencisë ruse të lajmeve, ministri rus i Mbrojtjes, Sergei Shoigu i tha presidentit Vladimir Putin se Mariupol është marrë.
Duke e informuar presidentin mbi situatën e fundit në Mariupol, Shoigu pohoi se forcat ruse kanë marrë kontrollin e qytetit.
Pasi raportoi se 1.478 ushtarë ishin dorëzuar, Shoigu shtoi se më shumë se 2.000 luftëtarë ukrainas ndodhen ende në fabrikën e çelikut “Azovstal” në Mariupol.
Ministri Shoigu i tha gjithashtu Putinit se më shumë se nga Mariupol janë evakuuar 142.000 civilë, uzina “Azovstal” është e rrethuar në mënyrë të sigurt dhe situata në qytet është e qetë.
Ndërkohë, Putin e përgëzoi Shoigun për operacionin e suksesshëm në Mariupol.
Marrja e Mariupolit është një sukses, siguria e jetëve të ukrainasve që largohen nga “Azovstal” do të jetë e garantuar, tha Vladimir Putin.
Përveç kësaj, Putin urdhëroi që fabrika “Azovstal” në Mariupol të mos sulmohej dhe që forcat ukrainase që linin armët të trajtoheshin mirë.
Raportohet se Putin ka urdhëruar bllokimin e objekteve dhe jo bastisjen e tyre.
Sekretari i Përgjithshëm i Kombeve të Bashkuara (OKB), Antonio Guterres kërkoi një takim me presidentin rus Vladimir Putin dhe presidentin ukrainas Volodymyr Zelensky.
Zëdhënësi i Sekretarit të Përgjithshëm të OKB-së, Stephane Dujarric, deklaroi në konferencën e tij të përditshme për shtyp se Sekretari i Përgjithshëm i Kombeve të Bashkuara (OKB) Antonio Guterres u ka dërguar nga një letër Misioneve të Përhershme të Rusisë dhe Ukrainës në OKB.
Në letrën e tij Guterres i kërkoi Putinit të takohej në Moskë dhe Zelenskiy në Kiev për të diskutuar hapat urgjent që duhet të ndërmerren për paqen në Ukrainë,- u tha Dujarric gazetarëve.
