Drejtësia britanike ka përcaktuar shumën faraonike që sundimtari i Dubait do të duhet t’ia paguajë ish bashkëshortes dhe nënës së dy fëmijëve të tij
Sundimtari i Dubait, Mohammed ben Rached al-Maktoum, u urdhërua të martën nga drejtësia britanike që t’i paguante më shumë se 640 milionë euro (rreth 665 milionë franga) ish-bashkëshortes së tij dhe fëmijëve të tyre, që konsiderohet si kompensimi më i lartë i divorcit nga një gjykatë angleze.
Sundimtari 72-vjeçar, kreu i qeverisë së Emirateve të Bashkuara Arabe, do të duhet t’i paguajë rreth 300 milionë euro gruas së tij të gjashtë, Princeshës Haya të Jordanisë, 47 vjeç, dhe të bëjë pagesa për fëmijët e tyre Al Jalila, 14 vjeç dhe Zayed, nëntëvjeçar, që përfaqësojnë më shumë se 340 milionë euro për të mbuluar alimentacionin dhe shpenzimet që lidhen me sigurinë e tyre, sipas një vendimi të gjykatës së çështjeve familjare të lëshuar të martën.
“Duke pasur parasysh statusin e tyre dhe kërcënimet e përgjithshme të terrorizmit dhe rrëmbimit me të cilët përballen në rrethana të tilla, ata janë veçanërisht të cenueshëm dhe kanë nevojë për siguri të shtuar për të garantuar sigurinë e tyre në këtë vend”, tha gjykatësi Moor në marrjen e vendimit të tij, informon portali Shtegu. Ai shtoi se “kërcënimi kryesor me të cilin përballen vjen nga vetë ai (sundimtari), jo nga burime të jashtme”.
Gjykata e Lartë vendosi në tetor se Mohammed ben Rached al-Maktoum kishte autorizuar hakimin e telefonit të gruas së tij, Princeshës Haya të Jordanisë dhe atyre të avokatëve të tij britanikë. Nuk ishte vërtetuar se hakerimi ishte i lidhur me betejën ligjore midis tij në Mbretërinë e Bashkuar dhe gruas së tij për të siguruar kthimin në Dubai të dy fëmijëve të tyre, por një vëllim “shumë i madh” prej 265 megabajt të të dhënave ishte marrë nga Telefoni i Princeshës Haya (24 orë regjistrim zëri ose 500 fotografi).
Gjykatësi theksoi se sundimtari kishte “ngacmuar dhe frikësuar nënën para se të nisej për në Angli dhe që atëherë” dhe se ai ishte “i gatshëm të toleronte që ata që veprojnë në emër të saj ta bëjnë këtë në mënyrë të paligjshme në Mbretërinë e Bashkuar”.
Masat e kompensimit financiar të dhëna të martën, ishin ndër më të mëdhatë e dhëna ndonjëherë në kuadrin e një zgjidhjeje divorci përpara gjykatës angleze, që nga rasti i ish-bashkëshortes së miliarderit rus Farkhad Akhmedov, Tatiana Akhmedova.
Në fund të vitit 2016, drejtësia i kishte dhënë Tatiana Akhmedova 41% të pasurisë së ish-bashkëshortit të saj, Farkhad Akhmedov, që përfaqëson 453 milionë paund, ose 531 milionë euro me kursin aktual.
