Edhe pse ai është ende një lojtar aktiv, një film i ri premierë i shfaqur të premten po përpiqet të tregojë historinë e futbollistit suedez, Zlatan Ibrahimoviq, duke u fokusuar në fëmijërinë e yllit duke u rritur në një pjesë të varfër të qytetit të Malmos. Ibrahimoviq, lojtari më i suksesshëm i Suedisë, ende luan për skuadrën e Milanit në moshën 40-vjeçare dhe është i njohur për trimërinë dhe guximin e tij, duke qëndruar në kontrast me bashkatdhetarët e tij zakonisht më të përulur.
Pasi filloi karrierën te Malmo FF të Suedisë në vitin 1999, ai ka vazhduar të luajë për skuadrat kryesore të Evropës, duke përfshirë Ajaxin, Juventusin, Interin, Barcelonan, Paris Saint-Germainin dhe Manchester Unitedin. I paraqitur si një “histori e vërtetë e autsajderit”, filmi “Jag ar Zlatan” (Unë jam Zlatani), që u shfaq premierë të premten, bazohet në librin autobiografik me të njëjtin emër, por regjisori Jens Sjogren tha se ai donte të trajtonte në film vitet e para të lojtarit.
“Kur lexova kapitujt e parë të librit, mendova për fëmijërinë time”, tha Sjogren, që shtoi se duke u fokusuar te i riu Zlatan, filmi ka të ngjarë të tërheqë jo vetëm ata që e kanë ndjekur karrierën e futbollit të Ibrahimoviqit. “Edhe pse Zlatani ka pasur një fëmijëri të ashpër, ndonjëherë ne të gjithë kemi qenë fëmijë dhe kemi luftuar me gjëra të ndryshme”.
Për regjisorin 45-vjeçar, ishte e rëndësishme që filmi të tregonte historinë edhe nga këndvështrimi i një fëmije.
“Atë që ai po përjeton, ne mund ta përjetojmë, por kur ka gjëra që ai nuk i dëgjon ose nuk i kupton, atëherë ne si spektatorë nuk duhet ta kuptojmë këtë”, tha ai.
Filmi fillon të ndjekë Zlatanin prej moshës 12-vjeçare, kur ai kishte vështirësi në shkollë. Ai gjithashtu e tregon atë duke u larguar nga nëna dhe babai i tij, përpara se të kalonte në vitet e tij të para si lojtar profesionist në Malmo dhe Ajax. Detyra, ndoshta, disi e frikshme për të portretizuar një ikonë ende të gjallë në ekran iu dha aktorëve që luajtën për herë të parë, Dominic Bajraktari Andersson, 15 vjeç dhe Granit Rushitit, 22 vjeç, të cilët e luajnë Zlatan në mosha të ndryshme.
“Ai është një futbollist i madh, një nga më të mirët në botë. Ai është një legjendë, kështu që është sigurisht një nder i madh për ne që të luajmë me të”, pranoi Rushiti.
Si një ish-futbollist i ri premtues, megjithëse iu desh të tërhiqej pas një dëmtimi, Rushiti tha se Zlatani kishte qenë tashmë një frymëzim për të.
“Kam luajtur futboll gjatë gjithë jetës sime, kështu që ai ka qenë një pjesë e madhe e jetës sime dhe karrierës sime në futboll. Kështu që, kam marrë shumë prej tij”, tha Rushiti.
Të dy, Rushiti dhe Bajraktari Andersson, ashtu si vetë Zlatani, janë nga Scania që gjendet në jugun e largët të Suedisë.
“Unë nuk kam luajtur gjithmonë futboll, por ai ka qenë një model në mënyra të tjera. Ashtu si sjellja e tij dhe si është ai si person. Ne jemi afërsisht nga e njëjta zonë, i njëjti qytet Malmo. Kështu që, ai ka qenë një model i shkëlqyer”, pranoi Bajraktari Andersson.
Kur përfunduan xhirimet e filmit, dy aktorët e rinj patën mundësinë të takojnë edhe Zlatanin në Milano.
“Para se të fillonim xhirimet e filmit, mendova se Zlatani ishte goxha i ashpër, ai pothuajse dukej i frikshëm. Por kur e takova ai ishte shumë i sjellshëm, ishte shumë simpatik dhe bënte shaka. Ai më bëri të pushoja dhe i gjithë nervozizmi thjesht u zhduk”, zbuloi Bajraktari Andersson. “Ishte si të takoje një legjendë të gjallë që e ke parë vetëm në televizor”.
Premiera e filmit të Zlatanit ishte e rezervuar për Suedinë. Më shumë vende do të pasojnë, megjithatë në javët në vijim. Ndërsa statusi i Zlatanit si futbollisti më i madh që ka prodhuar ndonjëherë Suedia është i padiskutueshëm në vendin e tij, shkëlqimi i tij në qytetin e tij të lindjes, Malmo është zbehur disi.
Vetëm disa muaj pasi një statujë e heroit vendas u ngrit në Malmo, ajo u bë objektiv i akteve të shumta të vandalizmit, pasi Ibrahimoviqi njoftoi se po blinte aksione në klubin me bazë nga Stokholmi, Hammarby, rivali i madh i Malmos.
E parë si një tradhti nga fansat, statuja është lyer me spërkatje, është rrëzuar dhe pjesë të saj janë prerë.
