UASHINGTON, 13 dhjetor /ATSH-DPA/- Eksperimenti i shkrirjes bërthamore që prodhoi më shumë energji sesa konsumonte, i pari që mund të përmbyste të gjithë fushën e prodhimit të energjisë, përbën një moment historik, deklaroi sot Departamenti i Energjisë në SHBA (DOE).
“Ky është një njoftim për të cilin kemi dekada që përgatitemi,” shkroi departamenti në Twitter.
“Më 5 dhjetor 2022, një ekip i DOE’s “Lawrence Livermore National Laboratory” bëri histori duke arritur shkrirjen berthamore, duke krijuar një reaksion bërthamor që gjeneron më shumë energji sesa konsumon. Ky zbulim do të ndryshojë përgjithmonë të ardhmen e energjisë së pastër dhe mbrojtjes kombëtare të Amerikës”.
“Sot i tregojmë botës se Amerika ka arritur një progres të jashtëzakonshëm shkencor”, tha ministrja e Energjisë në SHBA, Jennifer Granholm, në Uashington.
Si energjia bërthamore ashtu edhe shkrirja bërthamore gjenerojnë energji nga forcat lidhëse të bërthamave atomike. Megjithatë, në energjinë bërthamore, atomet e mëdha ndahen, ndër të tjera prodhohen mbetje radioaktive dhe ekziston rreziku i aksidenteve të rënda.
Në shkrirjen bërthamore, nga ana tjetër, bërthamat e vogla atomike shkrihen në ato më të mëdha, një teknologji që konsiderohet më e pastër dhe më e sigurt. Procesi i ngjan gjenerimit të energjisë në yje si dielli.//a.i/
