UASHINGTON, 23 mars /ATSH-DPA/- Shtetet e Bashkuara kanë akuzuar forcat ruse në Ukrainë për kryerjen e krimeve të luftës një muaj pasi Moska nisi pushtimin e saj me zotimin se kishte në shënjestër vetëm objektet ushtarake.
“Bazuar në informacionin e disponueshëm aktualisht, qeveria amerikane vlerëson se anëtarët e forcave ruse kanë kryer krime lufte në Ukrainë”, deklaroi sot sekretari amerikan i Shtetit, Antony Blinken.
Blinken përmendi shkatërrimin e ndërtesave të banimit, shkollave, spitaleve, qendrave tregtare dhe infrastrukturës.
Sekretari amerikan i Shtetit, Blinken tha se ka patur raporte të shumta të besueshme “për sulme që shënjestronin civilët, si dhe mizori të tjera”, ku taktikat e luftës së Rusisë kanë qënë të ngjashme me ato që përdori në Çeçeni dhe Siri.
“SHBA-ja do të ndihmojë aleatët dhe institucionet ndërkombëtare në ndjekjen penale të shkelësve në vendet e duhura ligjore”, tha ai.
Presidenti amerikan Joe Biden e quajti presidentin rus Vladimir Putin një “kriminel lufte” dhe “diktator vrasës” javën e kaluar, komente që zemëruan Moskën duke i dërguar ambasadorit të SHBA-së në Moskë një letër ankese. //a.i/
