UASHINGTON, 6 korrik /ATSH-DPA/- Presidenti i SHBA-së, Joe Biden e ka siguruar Suedinë për mbështetjen e tij të plotë drejt anëtarësimit në NATO.
“Suedia do ta bëjë aleancën tonë më të fortë”, tha Biden gjatë vizitës së kryeministrit suedez, Ulf Kristersson dje në Shtëpinë e Bardhë.
Biden theksoi se Shtetet e Bashkuara të Amerikës ishin duke pritur me padurim anëtarësimin e Suedisë, pas ngërçit politik muajt e fundit, pasi Turqia dhe Hungaria kanë bllokuar ratifikimin e protokollit për pranimin e Suedisë.
Anëtarët e rinj duhet të miratohen unanimisht nga të gjithë anëtarët ekzistues të NATO-s.
Udhëheqësi i SHBA-së vlerësoi Suedinë si një aleate të fortë dhe të qëndrueshme për NATO-n.
Kristersson u përgjigj duke thënë se Suedia dëshiron të bashkohet me NATO-n për të kërkuar mbrojtje të përbashkët, por se vendi gjithashtu ndjen se mund të sigurojë asetet e veta për sigurinë e NATO-s, në tërësi.
Kërkesa e Suedisë në NATO, e nxitur nga pushtimi i Rusisë në Ukrainë, pavarësisht neutralitetit suedez të mbajtur prej kohësh, u bë së bashku me Finlandën, e cila është pranuar në aleancë.
Protestat anti-islame në Suedi kanë shkaktuar tensione të konsiderueshme midis Stokholmit dhe Ankarasë, muajt e fundit.
Mbetet ende e paqartë nëse mosmarrëveshja mund të zgjidhet në samitin e NATO-s në Vilnius, Lituani të martën dhe të mërkurën e ardhshme. //a.i/
