Komisioni Parlamentar për Financa dhe Buxhet sot do të vazhdojë debatin rreth amendamenteve për rishikimin e buxhetit, në kuadër të seancës së 38-të. Deri më tani janë shqyrtuar 13 nga 204 amendamentet e propozuara dhe asnjëri prej tyre nuk është miratuar. Kjo është dita e gjashtë nga gjithsej dhjetë ditët, që parashikohen në bazë të rregullores për punën e Kuvendit.
Janë parashtruar gjithsej 204 amendamente, nga të cilat mbi 170 nga grupi parlamentar i VMRO-DPMNE, 28 nga Aleanca për Shqiptarët dhe dy nga shumica parlamentare.
Deputetët e opozitës dhe qeverisë deri më tani kanë pasur qëndrime të kundërta. Opozita thotë se me amendamentet e propozuara po mundohet të përmirësojë kushtet e jetesës së qytetarëve dhe qytetarët ta ndjejnë më pak për krizën energjetike. Shumica qeverisëse është e mendimit se përllogaritja e parashikuar në ribalancin do të sigurojë mbrojtjen e standardit të qytetarëve dhe tejkalimin e sfidave.
