Futbolli brazilian është në zi, pas publikimit të lajmit për vdekjen e sulmuesit 21-vjeçar Felipe Diogo.
Sipas mediave lokale, lojtari i Sao Bernardo, i cili po kthehej nga pushimet, është qëlluar për vdekje me gjakftohtësi në një rrugë në qytetin e tij të lindjes, Ribeirao Preto. Agjencia braziliane e lajmeve ge.globo raportoi se futbollisti i ri u godit nga 10 plumba dhe, megjithëse u dërgua me urgjencë në spital, ai humbi jetën.
Policia vendase po heton motivin e vrasjes, ndërsa klubi i tij, i cili merr pjesë në Kategorinë e tretë të Brazilit, ka shprehur pikëllimin për humbjen e tij.
“Klubi i futbollit, São Bernardo, shpreh pikëllimin e tij për vdekjen e atletit tonë, Felipe Diogo Bernardes Ferreira, i njohur si Felipe Diogo. Zoti ngushëlloftë zemrat e familjes së tij në këtë moment dhimbjeje të thellë”.
I ndjeri luajti ndër të tjera për Cruzeiro dhe Botafogo, ndërsa vitin e kaluar iu bashkua São Bernardo dhe ishte një nga protagonistët kryesorë të promovimit, me 18 paraqitje dhe 4 gola.
Top Channel
