Është prezantuar modeli i stadiumit të ri, të cilin e planifikojnë të ndërtojnë Interi dhe Milani.
Ajo është mbiquajtur “Katedralja” për shkak të dizejnit të saj duke marrë elemente nga Katedralja legjendare ‘Duomo’ në Milano dhe Galeria.
Stadium i ri do të ndërtohet pranë stadiumit ekzistues “Giuseppe Meazza”, i cili më pas mund të rrëzohet ose të paktën të kthehet në një arenë më të vogël për të luajtur futbollin e femrave dhe ekipet e të rinjve.
“Katedralja është projektuar për të krijuar një shtëpi unike për tifozët dhe mbështetësit e AC Milan dhe FC Internazionale Milano, me instalime të personalizuara që ndryshojnë në mënyrë dramatike pamjen e arkitekturës dhe përfshijnë identitetet unike të klubeve në strukturën e ndërtesës.
Stadiumi është projektuar të jetë stadiumi më i qëndrueshëm në Evropë. Galeria ftohet natyrshëm dhe ngrohet në mënyrë pasive, panelet rreshtojnë çatinë e stadiumit për të gjeneruar energji elektrike që ruhet në bankat e baterive për përdorim të mëvonshëm dhe i gjithë uji i shiut mblidhet nga çatia dhe ripërdoret.
Stadiumi është i rrethuar nga 22 hektarë hapësirë të gjelbër, të cilat reduktojnë rrjedhjen e ujit dhe kundërshtojnë efektin e ‘ishullit të nxehtësisë’. I gjithë rrethi është i lidhur me një sistem qendror ngrohje dhe ftohje”, thuhet ndër të tjerash në njoftimin zyrtar të klubit të Milanos.
Stadiumi i ri i Milanit dhe Interit duhet të ndërtohet në zonën e San Siros, dhe duhet të jetë gati në vitin 2027. Ai do të jetë më i vogël se Meazza, me një kapacitet prej 65,000 vendesh kundrejt 80,000 të tanishëm.
Do të ketë më shumë vende ekzekutive për të maksimizuar të ardhurat, me Interin dhe Milanin që pritet të fitojnë 80 milionë euro çdo vit nga shtëpia e tyre e re.
